2025 жылғы 3 шілдеде Астанада ҚР Ұлттық музейінде «Геральдикалық зерттеулер орталығы» жанынан құрылған «Tańba» ғылыми-әдістемелік клубының кезекті отырысы өтті.
Іс-шараға министрлік өкілдері, белгілі тарихшылар мен геральдика саласының мамандары, жас зерттеушілер мен түрлі сала сарапшылары қатысты.
Клуб жұмысының негізгі мақсаты – мемлекеттік рәміздер мен геральдикалық белгілерді зерттеу, оларды насихаттау және осы бағыттағы ғылыми-тәжірибелік мәселелерді саралау.
Отырыста мемлекеттік рәміздердің елдік сана мен ұлттық бірегейлікті нығайтудағы маңызы, геральдикалық саясаттың ғылыми негізделуі қажеттігі айтылды. Сондай-ақ, қазақ геральдикасының даму бағыттары мен заманауи талаптарға сай жетілдіру жолдары кеңінен талқыланды.
Қатысушылар мемлекеттік рәміздерді насихаттауда цифрлық медиа құралдарын тиімді пайдалану, оқулықтар мен танымдық материалдарда геральдикалық тақырыпты кеңінен қамту, сондай-ақ ведомстволық және аймақтық нышандар жүйесін біріздендіру мәселелеріне ерекше назар аударды.
Сарапшылар еліміздің тарихи және мәдени кодына сай келетін жаңа геральдикалық шешімдер ұсынды. Сонымен қатар, жастар арасында рәміздерге деген құрметті арттырудың жолдары, саланың нормативтік-құқықтық базасын жетілдіру және халықаралық тәжірибені енгізу мәселелері де қозғалды.
«Tańba» ғылыми-әдістемелік клубының жұмысы алдағы уақытта да геральдика саласындағы ғылыми ізденістерге жол ашып, мемлекеттік рәміздерге қатысты жаңа көзқарас қалыптастыруға ықпал етпек.